Blau, blau, blau...

...blüht der Enzian! Genau, dr Heino hets scho gsunge u wär sich das möchti atue, dä klickt hie.

Aber hie geits nume um d'Farb blau u nid um Enzian u no viu weniger um Heino ;-) Mir hei d'Ufgab übercho, monochromi Biuder z'mache. Das heisst Fotos, mit nume eire Farb. Bevor mir gwüsst hei, um wases geit, hei mir üsi Lieblingsfarb müesse säge. U bi mir isches... Genau! U das si d'Resultat:

Ä läbeslänglechi Faszination

Sit langem bini geschter mau wieder am Thunersee gsi. Ufem Wäg nach Merlige hani zwüschine aghaute u probiert, die Schönheit vom See mit äm Niese u dr Stockhornchötti izfah. Ig weiss nid, wie mängisch ig das Panorama scho bewunderet ha - d'Faszination blibt ewig!

Hie geits zur chline Galerie.

Schloss Landshut

Bis hüt hani no nie öppis vo däm Schloss, wo bi Utzenstorf steit, ghört - was me dank äm Fötele nid aues entdeckt :-) Ds Schloss säuber isch zue gseh, aber es het dört ä schöne Park wome cha spaziere. Vor Vegetation här isches haut no sehr karg, aber me cha öppe erahne, wie schöns de dört im Frühelig isch.

Hie geits zu de Impressione.

Instagram & Followgram

Hüt hani dank ämene Hiwis Instagram & Followgram entdeckt - ä ganz geniali Sach! Instagram isch ä Foto-App für's iPhone mit Fiuter, wo nach mir super Effekte erzüge. Me cha natürlech grad diräkt vom iPhone us die Biuder uf Facebook oder Twitter poste. Äs git aber quasi no ä Zuesatz-Plattform im Internet, nämlech Followgram. Dört chame sich mit äm Instragram-Account ilogge u scho het me äs Profil. So wienis bis itze begriffe ha, chame när dört Biuder like, angerne User folge u wahrschinlech no äs paar Sache meh. Wenn sich auso öpper uskennt mit dene Tools, de bitte mäude für Tipps & Tricks!

Mi hets vorallem grad fasziniert, wü da ächt cooli Biuder si zum iPhone use cho (chani äch mini D300 verchoufe?). U was mit Social Media z'tüe het, packt mi ja eh :-)

So, u itze Compi abefahre - wünsche aune äs schöns Weekend!

Breitsch

Ändlech isches wieder chlei wärmer u so hets mi hüt i Breitsch zoge. Für aui nid Bärner: Dr Breitsch (Breitenrain) isch äs Quartier in Bärn mit ä huufe lässige Eggeli.

Hie geits zu de Idrück.